الكمبيوتر الكفي - samsung galaxy mega 6.3 العملاق

السلام عليكم ورحمة الله وبركاته
انا اشتريت سامسونج جالاكسي ميجا 6.3 ويعرف ايضا بأسم i9200
ونظرا لأني استفدت كتييييييير جدا من هذا المنتدي الرائع الذي لا ينافسه اي منتدي آخر بلا مبالغة
لاني كان معايا نوت 1 بقالو سنتين معايا كل لما اعمل سيرش علي حاجة خاصه به
كنت الاقي هذا المنتدي الرائع يظهر في البحث (ما شاء الله ولا قوة الا بالله)
المهم مش هاطول عليكو
انا كنت محتار وعايز اغير التليفون بتاعي وكنت هاشتري تاب 7 او 8
بس كانت مشكلتي في كذا حاجة
1- الحجم
2- الكاميرا والفلاش
3- السرعة في الاداء

وكنت محتار استني النوت3 بس سعره غالي ولا اشتري اس4 وسعره بردو غالي
المهم كنت عايز موبيل سريع وكبير
ولقيت الميجا ولقيت منه نوعين نوع بخط وشاشة 6.3 انش ونوع بخطين وشاشة 5.8
والحمد لله ربنا هداني للميجا 6.3 وبصراحة قبل ما اشتري متعود ادخل علي موقع gsmarena واشوف آراء الناس اللي اشتروا وبصراحة لقيت الكل بيشكر فيه ومحدش اشتكي غير من الحجم
ولقيت ناس بتقول اسرع من النوت2
المهم توكلت علي الله واشتريته
وبعد تجربه كام يوم ما شاء الله والله فعلا جهاز تحفة
يكفي بس اني بشيل النوت1 من علي الشاحن الصبح الساعة 7 وعقبال ما اوصل الشغل واستخدمه فيس بوك وواتس اب علي الساعة 11 بيكون بيتشحن تاني علشان البطارية بتصرف جامد جدا
لكن الميجا من الساعة 7 اشيله من علي الشاحن والبطارية تمام ممتلئة وارجع البيت والبطارية لسه 40% علي الساعة 5 بعد العصر ونفس الاستخدام اللي كنت بستخدمه في النوت1
ثانيا ::: مافيش تهنيج خالص ما شاء الله ،،،، سرعة عالية جدا مش مصدقها وضوح الشاشة مش بطال هو مش زي النوت1 لان النوت1 super amoled ، اما الميجا lcd انا مش حاسس بالفرق قوي ومش فارق معايا لان الشاشة حلوة بردو احسن من الشاشة ال tft الموجوده في الميجا 5.8
الجهاز كبير نوعا ما لاول وهلة بس خلاص اتعودت عليه وبكتب بأيد واحدة وبكتب وانا سايق هو في صعوبه شوية بس اتعودت ،
التليفون علي الشحن يادوب ساعتين ويكون اتشحن
طبعا خاصية الاير فيو Air view الموجودة في الاس4 لانه نفس السوفت وير
وفعلا الجهاز dual core بس الاداء بتاعه ما شاء الله كأنه Quad-core اللي موجود في الاس4
كمان فيه ريموت كنترول تظبطه علي نوع التلفزيون والريسيفر اللي عنده بس يكون ماركة ، انا التلفزيون بتاعي ال سي دي توشيبا اتولف عليه علي طول اما الريسيفر ماركة غير معروفة ومعرفتش اشغل الموبيل عليه ، انا بطفي واشغل التلفزيون منه وبعلي وبوطي وادخل علي المنيو كأنه ريموت كنترول بتاع التلفزيون
الكاميرا سريعه وحلوة
المشكلة بس ان ذاكرة التليفون 8 جيجا واشتريت كارت 8 جيجا للتغلب علي المشكلة دي
بعتذر عن الاسلوب الغير منظم في الموضوع
بس حبيت انقل خبرتي المحدودة للتليفون لعلي افيد اي حد عايز يشتري ومحتار ما بين التاب لان معظم كاميرات التاب 7 او 8 او 10 كاميرا ضعيفة ومن غير فلاش وفي نفس الوقت كبير الحجم
انا كمان بشيله في الجيب الخلفي للبنطلون عادي
واتعودت عليه
وآسف للأطالة وانا موجود لأي اسئلة اقدر افيد بيها ، بس ده واجب عليا لاني استفدت كتير من المنتدي وحابب افيد كمان مع اعلم اني الحمد لله بقيت انزل سوفت وير لاصحابي واعمل روت للاجهزة وحاجات كتير اتعلمتها من هذا المنتدي الرائع وده اقل شيء اقدمه للاعضاء المحترمين من باب حب لأخيك ما تحبه لنفسك
والسلام عليكم ورحمة الله وبركاته